ᑐᑦᑕᕐᕕᖓ > ᐊᓯᔾᔨᐸᓪᓕᐊᓂᖏᑦ > ᐃᓄᐃᑦ ᖃᐅᔨᒪᔭᑐᖃᖏᑦ: ᐊᖓᒃᑰᓂᕐᓗ ᐅᓪᓗᒥᓕᓴᐅᓕᖅᑐᓄᑦ ᓇᒻᒪᙱᓐᓂᓪᓕᐅᖅᐸᒃᑐᓂᒃ ᐋᖅᑭᒃᓱᐃᓂᖅ

Traditional celebration at Tony Otuk’s home. Arviat

ᐃᓄᐃᑦ ᖃᐅᔨᒪᔭᑐᖃᖏᑦ: ᐊᖓᒃᑰᓂᕐᓗ ᐅᓪᓗᒥᓕᓴᐅᓕᖅᑐᓄᑦ ᓇᒻᒪᙱᓐᓂᓪᓕᐅᖅᐸᒃᑐᓂᒃ ᐋᖅᑭᒃᓱᐃᓂᖅ

ᓇᐃᓪᓕᑎᖅᓯᒪᔪᖅ ᐅᓂᒃᑳᖅ:
ᐅᓂᒃᑳᖅ

ᒪᓕᒐᖅᑕᖃᓚᐅᓐᖏᑦᑐᖅ ᐃᓄᐃᑦ ᐱᖅᑯᓯᖏᓐᓂ ᑭᓯᐊᓂᓕ ᖃᐅᔨᒪᓂᖏᓐᓂ ᓇᒻᒥᓂᖅ ᐅᓂᒃᑳᖃᕐᓂᐊᖅᑐᒃ ᓂᐱᓕᐅᖅᑕᐅᓪᓗᑎᒃ ᐊᑐᐃᓐᓇᐅᖁᔭᐅᓪᓗᑎᒃ. ᐱᐅᔪᑦ ᐃᑉᐱᒋᔭᖏᑦ ᐃᓅᓯᕐᓂᓪᓗ ᐊᑐᕆᐊᖃᖅᑐᑦ ᐃᓅᓯᕐᒥᑦ ᐊᔾᔨᒌᖃᑦᑕᓚᐅᖏᓐᑦᑐᑦ, ᑭᓯᐊᓂᓕ ᐅᑉᐱᕆᔭᐃᑦ ᐊᔾᔨᒌᖃᑦᑕᓚᐅᓐᖏᒻᒥᔪᑦ ᐊᓯᔾᔨᐸᓪᓕᐊᓂᖏᓐᓂᓪᓗ. ᐃᓐᓇᐃᑦ ᐅᖃᓚᐅᖅᑐᒃ ᐱᒻᒪᕆᐅᒻᒪᑦ ᐊᓯᔾᔨᕐᓂᐅᔪᑦ ᐊᑐᖃᑦᑕᖅᓯᒪᔭᖏᑦ ᓱᕈᓯᐅᑎᓪᓗᒋᑦ.
ᓯᕗᓕᖅᑏᑦ ᑐᓂᓯᓯᒪᒻᒪᑕ ᓄᑲᖅᑎᓄᑦ. ᐅᓪᓗᒥᐅᔪᖅ, ᐃᓐᓇᐃᑦ ᐃᑉᐱᒋᔭᐅᑦᑎᐊᖅᑐᔮᕈᓐᓃᕐᖓᑕᓕ. ᖃᐅᔨᒪᔪᑦ ᓱᓕ ᐱᒻᒪᕆᐅᒻᒪᑕ ᐅᓪᓗᒥᐅᔪᖅ ᐃᓄᓐᓄᑦ. ᐱᑐᖃᐃᑦ ᓄᑖᓪᓗ ᐊᖅᑕᐅᒋᐊᖃᕐᖓᑕ ᓯᕗᓕᖅᑎᓂᒃ ᐃᓐᓇᕐᓂᑦ ᓄᑖᕐᓂᓪᓗ ᓯᕗᓕᖅᑎᐅᓂᐊᖅᑐᓂᒃ ᐃᓱᒪᒋᔭᐅᒋᐊᖃᖅᑐᑎᒃ.
ᐊᐱᖅᓱᖅᑏᑦ ᑖᔅᓱᒧᖓ ᐅᖃᓕᒫᒐᕐᒧᑦ ᓂᐱᓕᐅᖅᑕᐅᓚᐅᖅᑐᑦ ᓄᓇᒦᑦᑎᓪᓗᒋᑦ ᑲᖏᖅᖠᓂᕐᒥ ᔫᓂ 29-ᒧᑦ ᔪᓚᐃ 6-ᒧᑦ, 2000. ᑕᒪᒃᑯ ᐃᓐᓇᐃᑦ ᐃᖅᑲᐅᒪᔪᑦ ᐅᑉᐱᕐᓂᖅᑕᖃᓚᐅᖅᑎᓐᓇᒍ. ᕼᐊᓐᓄᕆ ᑲᑉᐹᓕᒃ, ᑲᖏᖅᖠᓂᕐᒥ, ᐊᖏᖃᑎᖃᓚᐅᖅᑐᖅ ᑐᑭᒥᐊᖅᑎᒋᑦ ᐱᒋᐊᖅᑎᑦᑎᒍᒪᓂᖓᓂ. ᑎᓴᒪᐅᔪᖅᑐᑦ ᐃᓐᓇᐃᑦ ᓴᑭᓐᖔᖅᓯᒪᑐᐃᓐᓇᖅᑐᑦ ᓂᕈᐊᖅᑕᐅᓚᐅᖅᑐᑦ ᐅᑯᐊᖑᓪᓗᑎᒃ: ᐆᓕ ᐃᑎᓐᓄᐊᖅ, ᐲᓕᒃᔅ ᐱᓱᒃ, ᒥᐊᕆᐊᓄ ᐊᐅᐱᓛᕐᔪᒃ ᐳᔭᐃᑦ ᑕᐸᖅᑎᓗ ᑲᖏᖅᖠᓂᕐᒥ, ᐲᑕ ᓱᕙᒃᓯᐅᑦ ᐊᕐᕕᐊᓂᑦ, ᓗᒃ ᓄᓕᐊᔪᒃ ᐅᖅᓱᖅᑐᕐᒥ, ᔫᓯ ᐊᖑᓐᖑᕐᓂᖅ ᓕᕙᐃ ᐃᓗᐃᑦᑐᕐᓗ ᑯᒑᕐᔪᒻᒥ.
ᐋᖅᑭᖅᑕᐅᓯᒪᓚᐅᖅᑐᑦ ᑲᑎᒪᓂᖏᓐᓂ ᐱᒻᒪᕆᐅᒻᒪᑦ ᑲᔪᓯᓐᓂᖃᑦᑎᐊᕐᓂᐊᕐᖓᑦ ᑲᔪᓯᓐᓂᖃᑦᑎᐊᖑᓪᓗᓂᓘᓐᓃᑦ. ᐆᓕ ᐃᑎᓐᓄᐊᑦ ᑐᐱᕐᕕᖓᓃᓚᐅᖅᑐᑦ. ᐊᑯᓂ, ᑮᓇᐅᔭᓂᓪᓗ ᐊᑐᒻᒪᕆᓚᐅᖅᑐᖅ ᐸᕐᓇᑦᑐᓂᓗ ᑲᑎᒪᓂᐅᓂᐊᖅᑐᒧᑦ ᓴᓇᒋᐊᖅᑐᓂᐅᓪᓗ ᐃᓪᓗᕋᓛᖁᑎᖓ ᑕᒪᑐᒥᖓ ᐱᔾᔪᑎᖃᖅᑐᓂ. ᑲᑎᖃᑦᑕᓚᐅᖅᑐᑦ ᖃᐅᑕᒫᑦ ᕿᔪᒻᒥ ᐃᓪᓗᕋᓛᕐᒥ. ᑲᑎᑉᐸᑦᑐᑎᒃ ᐅᓪᓗᒃᑯᑦ ᐅᓐᓄᑯᓪᓗ. ᐃᓐᓇᐃᑦ ᖁᕕᐊᑦᑎᐊᓚᐅᖅᑐᑦ ᑕᐃᒫᒃ ᐋᖅᑭᔅᓯᒪᓂᖃᓚᐅᕐᖓᑕ.
ᐅᖃᖅᑕᐅᓯᒪᔪᑦ:
ᐆᓕ ᐃᑎᓐᓄᐊᖅ
ᐃᓱᒪᔪᖓᓕ ᑕᕐᓂᑲᒻᒪᒻᒧᑦ ᐊᑦᑐᖅᑕᐅᓐᓂᕈᕕᑦ, ᐃᑉᐱᒍᓱᒃᑲᔭᖅᑐᑎᑦ ᑲᑉᐱᐊᓱᓐᓂᕐᒥᑦ. ᕿᒪᔅᓯᒍᒪᒐᓗᐊᖅᑐᑎᑦ ᑭᓯᐊᓂᓕ ᐊᑲᐅᒍᓐᓃᑐᐃᓐᓇᖅᑐᑎᑦ. ᑕᐃᒪᐃᑉᐸᓪᓚᐃᕙᑦᑐᑦ ᖃᓪᓕᔭᐅᓐᓂᕈᕕᑦ ᐱᐅᓐᖏᑦᑐᐊᓗᒻᒧᑦ. ᑕᕐᓂᑦᑎᐊᕙᒻᒥᑦ ᐃᓗᓐᓅᖅᑐᖃᕐᓂᖅᑲᑦ, ᑕᐃᒫᒃ ᐃᑉᐱᒍᓱᒃᑲᔭᓐᖏᑦᑐᑦ. ᐊᑐᖃᑦᑕᕐᓂᓕᕆᓐᖏᒃᑯᕕᐅᒃ ᑕᒪᓐᓇ, ᐊᑲᐅᒍᓐᓃᖃᑦᑕᕋᔭᖅᑐᑎᒃ. ᐱᐅᓐᓂᕋᓗᐊᖅᑲᑦ, ᖁᐊᖅᓵᕐᔪᑎᒋᔪᓐᓇᕐᒥᔭᐃᑦ. ᐃᑉᐱᒋᒍᒪᒐᔭᓐᖏᑕᐃᑦ ᐱᑕᓕᒃ. ᐃᓄᒃ ᑕᐃᒫᒃ ᐃᑉᐱᒍᓱᒃᑲᔭᖅᑐᖅ. ᑕᒻᒪᕈᓐᓇᖅᑐᑎᒃ ᓇᓪᓕᐊᖑᒻᒪᖓᖅ ᖃᐅᔨᒪᑦᑎᐊᕐᓂᖏᒃᑯᕕᑦ. ᐊᔪᕆᖅᓱᐃᔩᑦ ᐊᔪᕆᖅᓱᐃᒐᐃᒻᒪᑕ, ᐅᓂᒃᑳᖃᐃᓐᓇᖃᑦᑕᓚᐅᖅᓯᒪᔪᑦ ᑕᐃᒪᐃᑦᑐᓂᒃ. ᐊᔪᕆᖅᓱᐃᔩᑦ ᑕᕐᓂᒥᒃ ᓴᐃᒻᒪᑎᑦᑎᒐᓱᖃᑦᑕᓚᐅᖅᓯᒪᒻᒪᑕ, ᐊᖓᒃᑯᐃᓪᓕ ᒪᒥᑎᑦᑎᒐᓱᐊᖅᑐᑎᒃ ᑎᒥᒥᒃ ᑕᕐᓂᒥᓪᓗ. ᐱᐅᓐᖏᑦᑐᖅ ᐊᓂᑎᑕᐅᑐᐃᓐᓇᕋᓗᐊᖅᑐᓂ, ᑕᕐᓂᖅ ᐊᑲᐅᓯᑎᓪᓗᒍ ᒪᑭᒍᓐᓇᓯᓪᓗᑎᒃ. (ᒪᑉᐱᒐᖅ 48)